aoû
20
2015

FDLR n’u Burundi ni byo byibanzweho mu biganiro Kagame yagiranye n’intumwa ya USA mu biyaga bigari

Perezida Kagame kuri uyu wa Gatatu tariki ya 19 Kanama 2015, yakiriye intumwa idasanzwe ya Leta Zunze Ubumwe za Amerika mu karere k’Ibiyaga bigari ,Thomas Perriello.

Ibiganiro bagiranye byibanze ku kibazo cy’umutekano muke mu Burundi ndetse no ku kibazo cya FDLR imaze imyaka myinshi mu mashyamba ya Congo Kinshasa.

Nyuma y’ibi biganiro byamaze igihe gisaga isaha n’igice, Thomas Perriello yabwiye abanyamakuru ko bumwe mu buryo bwemeranyijweho bwo gushakira umuti ikibazo cy’umutekano muke mu Burundi, ari ibiganiro bya politiki bihuriweho na leta ndetse n’abatavuga rumwe na yo, ndetse bikagirwamo uruhare cyane n’abakuru b’igihugu byo mu karere.

Ati “[…] Hakwiye ibiganiro hagati ya leta n’abatavuga rumwe na yo, ariko bikagirwamo uruhare n’abakuru b’ibihugu bya Afurika y’uburasirazuba harimo na Museveni we wanatanze Minisitiri w’ingabo Kiyonga ngo abe umuhuza.”

Yavuze ko atari ibintu bikwiye kuba iby’igihugu kimwe cyangwa bibiri, bityo asaba buri wese kubigiramo uruhare haba Umuryango wa Afurika Yunze Ubumwe, Leta Zunze Ubumwe za Amerika, umuryango w’abibumbye ndetse n’umuryango mpuzamahanga.

Ati “Ntabwo ari ikintu gikwiye guharirwa umuntu umwe ahubwo buri wese akwiye kubigiramo uruhare yaba umuryango w’abibumbye, Leta Zunze Ubumwe za Amerika ndetse n’umuryango mpuzamahanga.”

N’ubwo agaragaza ko n’uruhare rw’abandi rukenewe, yagaragaje ko izingiro rya byose ryaba ibiganiro bihuriweho kuko ari byo byonyine bishobora gukemura ibibazo u Burundi bufite.

Si we wenyine uvuze ko hakwiye kubaho ibiganiro

Abandi basabye ko inzira y’ibiganiro bihuriweho ari yo yakwifashishwa mu gukemura burundu ikibazo cy’imvururu mu Burundi zimaze guhitana abakabakaba ijana, barimo umuryango wa Afurika Yunze Ubumwe, Umuryango w’Ubumwe bw’iburayi, Umuryango w’abibumbye, u Bubiligi ndetse n’ibindi bihugu.

Hari kandi na bamwe mu banyapolitiki mu Burundi batavuga rumwe na Leta n’ubu batarakira ibyavuye mu matora bakunze kwifuza ko habaho inzira y’ibiganiro ndetse hagakorwa n’andi matora akozwe mu Mucyo no mu bwisanzure atarangwamo Pierre Nkurunziza.

Aba barimo Charles Nditije wanatsindiye umwanya mu Nteko Ishinga Amategeko Umutwe w’Abadepite, ariko akanga kuwicaramo kuko atemera ibyavuye mu matora.

Igisa n’ihurizo rikomeye, ni uburyo u Burundi buzemera kwicara ku meza amwe, abahagarariye Leta bakumvikana n’abatavuga rumwe na bo ku myanzuro y’ingingo zizaganirwaho.

Ikibazo cya FDLR cyari cyaramizwe n’imvururu mu Burundi cyongeye kuganirwaho

Intumwa idasanzwe ya Leta Zunze Ubumwe za Amerika mu biyaga bigari yanabwiye abanyamakuru ko mu byo yaganiriyeho na Perezida Kagame harimo ikibazo cy’umutwe w’inyeshyamba wa FDLR umaze imyaka myinshi mu mashyamba ya Congo Kinshasa.

Yemeje ko nabo bazi ko uyu mutwe ari izingiro ry’umutekano muke mu karere kandi ko kimaze imyaka myinshi, ariko ashimangira ko bagiye gushyira igitutu ku bagomba kurwanya uyu mutwe kugeza igihe uzaba utagihari.

Ati “[…]Tuzi ko ikibazo cya FDLR ari ikibazo gihari kimaze iminsi kandi tuzi ko ari izingiro ry’umutekano muke mu karere….Tuzakora uko dushoboye dukomeze dushyire igitutu ku bagomba kuyirwanya kugeza igihe itsinzwe.”

Thomas Perriello yagizwe intumwa idasanzwe ya USA mu karere k’ibiyaga bigari muri Nyakanga uyu mwaka, asimbuye Russ Feingold wagiye ashinjwa intege nke mu guhangana n’ikibazo cy’umutwe w’inyeshyamba wa FDLR.

Uyu muyobozi mushya ategerejweho byinshi birimo guhangana n’imvururu za politiki mu Burundi ndetse no guhashya burundu umutwe w’inyeshyamba wa FDLR.

Langues: 
Genre journalistique: 
Thématiques: 

Partager