sep
01
2015

Abadepite bemeje Itegeko rigenga Buruse n’Inguzanyo bihabwa abanyeshuri muri Kaminuza

Nyuma y’impaka ndende, Abadepite 64 kuri 64 bari mu Nteko Ishinga Amategeko y’u Rwanda, batoye Itegeko rigenga inguzanyo na Buruse, riteganya ko umukoresha utazajya agira uruhare mu kwishyuza abakozi be bize ku nguzanyo, azajya abihanirwa.

Mbere yo kwemeza iryo Tegeko, Abadepite bagiye banenga ingingo zimwe na zimwe, ndetse bagaragaza amakenga akomeye kuri iri tegeko. Gusa byarangiye abari mu ngoro y’Inteko Ishingamategeko baritoye 100%.

Zimwe mu ngingo zagoranye cyane kuzitorera, harimo izivuga uruhare rw’umukoresha mu kwishyura kw’umunyeshuri n’ibihano ahabwa iyo atabikoze.

Hagarutswe kandi ku nyungu ya 11% umunyeshuri azajya yungukira ikigo cy’Imari bivuye kuri 7% yari asanzwe ateganyijwe.

Itegeko rivuga ko bitarenze icyumweru kimwe (1) uhereye igihe umukozi yaherewe akazi, Umukoresha agomba kumenyesha ikigo cy‘imari ko umukozi we ugomba kwishyura inguzanyo yo kwiga.

Abadepite barimo Nyirarukundo Ignacienne, Nkusi Juvenal na Depite Rwanda bavuze ko byibuze umunyeshuri akwiye guhabwa amezi atandatu.

Mu ngingo ya 24 hagaragaramo ko iyo umukoresha atamenyekanishije mu kigo cy‘imari umukozi we wahawe inguzanyo akimara guhabwa akazi, ahanishwa kwishyura buri kwezi amafaranga angana n’icumi ku ijana (10%) y’inyungu y’amafaranga umukozi we yagombaga kuba yarishyuye. Iki gihano kandi ni cyo gihabwa umunyeshuri wagize ubukererwe.

Minisitiri w’Uburezi Dr. Papias Musafiri yavuze ko izi ngamba zose ari ukugirango ahaboneka amakuru hose ngo iri tegeko ryubahirizwe bishyirwe mu bikorwa.

Ngo amafaranga menshi aturuka ku mukoresha kandi amafaranga azajya atanga atari aye icyo asabwa ari ukumenyekanisha no gukata umushahara gusa.

Minisitiri Musafiri avuga ko iri tegeko rizakemura ibyananiye andi mategeko, ndetse kuba amafaranga menshi aturuka ku mushahara kandi hakaba harafashwe ingamba zikomeye.

Iri tegeko rizatangira gushyirwa mu bikorwa nirimara gumamwa no gutangazwa na Perezida wa Repubulika, bityo kuva mu ntangiriro z’umwaka wa 2015/2016 rikaba rizatangira gushyirwa mu bikorwa.

Uyu mushinga w’Itegeko wemejwe n’Inama y’Abaminisitiri yo ku wa 14 Gicurasi 2015.

Itegeko riteganya ko umunyeshuri wiga mu Rwanda ashobora gusaba inguzanyo mu kigo cy‘imari kugira ngo yiyishyurire amafaranga y‘ishuri, amafaranga y’imibereho, n’amafaranga y’ubushakashatsi.

N’aho umunyeshuri wiga mu mahanga ashobora gusaba inguzanyo mu kigo cy‘imari kugira ngo yiyishyurire amafaranga y‘ishuri, amafaranga y’imibereho, amafaranga y’ubushakashatsi, itike imugeza aho yiga, n’amafaranga yo kwivuza.

Uyu mwaka hahawe inguzanyo abanyeshuri bashya bagera ku bihumbi 5,900.

Langues: 
Genre journalistique: 
Thématiques: 

Partager