aoû
04
2015

Abanyarwanda bagera ku bihumbi 12 bandura SIDA buri mwaka

Ubushakashatsi bw’ ikigo cy’igihugu cy’ubuzima bwerekana ko ubwandu bushya bwa Virusi itera Sida bungana na 2.27 ku ijana (2.27%), bingana n’abantu bagera ku bihumbi 12 bandura Vurusi itera Sida buri mwaka mu Rwanda.

Iyi mibare yatangajwe kuri uyu wa mbere tariki ya 03 Kanama 2015, mu nama y’iminsi ibiri ihuje impuguke n’abashakashatsi mu rwego rw’ubuzima, biga ku buryo bwo guhangana n’indwara ya Sida n’umwijima.

Umuyobozi w’ishami rishinzwe kurwanya Sida mu Kigo cy’igihugu cyita ku buzima(RBC), Dr. Nsanzimana Sabin, avuga ko ubusanzwe hajyaga hifashishwa uburyo bwo kugenekereza mu kumenya uko ubwandu bwifashe mu gihugu.

Yagize ati “…Ubu ngubu bwo ntabwo ari ukugenekereza, ni abantu twapimye turabakurikirana mu gihe cy’umwaka, tubapima amezi 12 yose, dusanga muri bo hari abanduye virusi itera Sida ku gipimo cya 2.27%.”

Imibare y’ ubushakashatsi kandi igaragaza ko abantu 3% mu Rwanda babana n’ubwandu bwa Sida, iyi mibare ikaba yari iteye itya mu 2005 na 2010 no muri ubu bushakashatsi bwakozwe hagati ya 2013 na 2014.

Dr. Nsanzimana avuga ko bigaragaza ko hari ababana n’ubwandu bamaze imyaka 10 bafata imiti igabanya virusi itera Sida, batagabanyuka cyangwa ngo biyongere cyane.

Yagize ati “Ni ukuvuga ko abafata imiti igabanya ubukana babayeho neza. Nta hantu hataba abantu bitaba Imana hakaba n’abavuka, ariko abenshi muri bo ni ababana na Virusi itera Sida bamaze igihe.”

Mu bihumbi 14 bakoreweho ubushakashatsi, ubwandu bwa Sida mu bagore buri hejuru kuri 3.5%, mu gihe mu bagabo ari 2.4%.

Ababana n’ubwandu bw’agakoko gatera Sida biyongera cyane mu mijyi bari ku kigero cya 5.6%, mu gihe mu cyaro ari 2.6%. Mu baryamana bahuje ibitsina ubwandu buri kuri 3.3%, mu gihe mu bari batakibana n’abo bari barashakanya kubw’impamvu zinyuranye, ubwandu bwa Sida buri kuri 11,1%.

Hari icyuho mu gukoresha agakingirizo

Ku bw’ubu bushakashatsi, nibura abantu 25% mu bakora imibonano mpuzabitsina ni bo bakoresha agakingirizo, nyamara mu babana n’ubwandu bwa Sida bo 33.1% gusa ni bo bagakoresha.

Dr. Nsanzimana avuga ko bigaragara ko hari aho badohotse mu gukoresha againgirizo n’ubwo bigoye gupima ikigero gakoreshwa ho mu baturage kuko hari ugakoresha rimwe, ubwa kabiri akakihorera.

Yakomeje agira ati “Turi kugerageza guhindura uburyo twagatangaga, kugira ngo tunoze bigedendanye n’uburyo abakiliya bacu bahindura imyitwarire mu ikoreshwa ry’agakingirizo.”

Gusiramura bizafasha mu kugabanya ubwandu bushya bwa Sida

Dr. Nsanzimana Sabin ushinzwe kurwanya Sida muri RBC, avuga ko batangira ibikorwa byo gusiramura abagabo, mu myaka ibiri ishize abagabo 13% ari bo bari basiramuye mu Rwanda, ariko ngo ubu bageze kuri 20%.

Yakomeje agira ati “Tumaze gusiramura abantu bagera ku bihumbi 600 mu mezi nka 18 ashize. Nitubikomeza tukagera nko ku bantu nka miliyoni ebyiri, tubifatanyije no gutanga imiti igabanya ubukana twizeye ko tuzagabanya ubwandu bushya nibura ho 66% kugera mu 2018.”

Mu mujyi wa Kigali ni ho hagaragara abagabo benshi basiramuye hafi 50%, mu gihe mu byaro ho kwisiramuza kw’ abagabo bikiri kuri 15%.

Mu myaka itanu ishize abakora uburaya ni bo bafite ubwandu bwa Sida cyane kuri 51 %, ariko ubu bwagabanutseho 10%, bugeze kuri 41%.

Zimwe muri gahunda zemejwe n’Umuryango w’abibubye mu kurwanya Sida mu myaka mike iri imbere, ni uko 90% by’ababana na Virusi itera Sida bagomba kumenya ko bayifite, 90% bagashyirwa ku miti igabanya ubukana na 90 % by’ abari ku miti bakagera ku rwego Virusi itera Sida itagitembera mu maraso yabo.

Abashakashatsi bakomeje kwiga ku buryo hatangizwa umuti unyobwa mu mezi atatu n’urushinge rwaterwa umurwayi mu mezi atandatu, nk’ uko abafite ubwandu batangiye bafata ibinini 22 ariko ubu bakaba bageze ku kinini kimwe.

Kurwanya Sida mu Rwanda bitwara miliyoni hafi 200 z’amadolari, ariko mu myaka hafi itanu ishize, amafaranga yagenerwaga ibi bikorwa amaze kugabanyuka ho hafi 35%.

Umunyamabanga mukuru w’Umuryango w’abibumbye Ban Ki Moon aherutse gutangaza ko muri 2030 Sida yaba yaranduwe burundu ku Isi.

Langues: 
Genre journalistique: 
Thématiques: 

Partager