avr
29
2016

Kigali: Hatashywe inzu izajya isukurirwamo imirambo y’Abayisilamu bitabye Imana

inyubako.jpg

Iyi nyubako ni yo izajya itunganirizwamo imirambo y'Abayisilamu bitabye Imana

Ni itegeko ry’Imana ko umuyisaramu wapfuye ashyingurwa yabanje gusukurwa, inzu ya mbere yagenewe gukorerwamo icyo gikorwa ikaba yatashywe ku mugaragaro ku nkunga y’umuryango wo muri Arabia Saudite witwa Hsaan Alkhayiriyah.

Mu myemerere y’Idini ya Islamu, umuntu agira agaciro iyo ari muzima, akanagira agaciro iyo yitabye Imana. Ni muri urwo rwego iyo umuntu yapfuye aba agomba guhabwa icyubahiro, agatunganywa, akozwa, akambikwa imyambaro y’umweru yabugenewe agasezerwaho n’umuryango we hanyuma akajya gushyingurwa.

Sheikh Sibomana Hamduni, yatangarije IGIHE ko gutunganya umurambo byari ingorabahizi. Yagize ati “Mu Rwanda nta nzu yo gutunganyirizamo imirambo yari ihari, abafite inzu nto byababangamiraga cyane kubera ko byasabaga ko babanza gusobora ibintu mu nzu kugira ngo batunganye umuntu witabye Imana.”

Ku nkunga y’Umuryango Al Hsaan Alkhayiriyah wo muri Arabia Saudite, ku kigo nderabuzima cya Cyahafi mu Karere ka Nyarugenge hubatswe inzu izajya itunganyirizwamo umurambo w’umuyisilamu witabye Imana.

Mohmed Zeyed Alsalaal, uhagarariye umuryango wa Al Hsaan Alkhayiriyah mu Rwanda, yavuze ko inzu nk’izi zizubakwa mu bice bitandukanye by’u Rwanda.

Yagize ati “Umuntu uzajya yitaba Imana, azajya azanwa na ’ambulance’ ku buntu hanyuma ajye gushyingurwa. Abakozi, ibikoresho ndetse n’amavuta y’imodoka ni twe tuzajya tubyishyura.”

Mufti w’u Rwanda Kayitare Ibrahim, yavuze ko iki ari igikorwa cy’indashyikirwa. Ati “Iyi ni inkingi y’ubugiraneza muri Islam, iki ni ikintu gikomeye cyane. Imana Nyagasani ikomeze ibahe ubushobozi bwo gukomeza gutera inkunga abayisilamu bo mu Rwanda.”

Mufti Kayitare yakomeje avuga ko ambulance zatanzwe n’Umuryango Al Hsaan Alkhayiriyah, atari iz’Abayisalamu gusa ko "Umuturanyi wacu utari umuyisilamu ntabwo yagira ibyago ngo abure gukoresha iyi modoka. Ntabwo izi ari imodoka zizafasha abayisilamu gusa ni iz’abanyarwanda."

Inzu izajya isukurirwamo imirambo, ibikoresho hamwe na ambulance ebyiri byashyikirijwe umuryango w’Abayisilamu mu Rwanda, bifite agaciro ka miliyoni 115 z’amafaranga y’u Rwanda, yose akaba yatanzwe n’umuryango Al Hsaan Alkhayiriyah.

Langues: 
Genre journalistique: 
Thématiques: 

Partager